Новости обителиКанун Недели 4-й по Пятидесятнице, празднование Собора преподобных отцов Псково-Печерских
Его Высокопреосвященству сослужили: епископ Веневский Феодорит, викарий Тульской епархии; епископ Петергофский Силуан, викарий Санкт-Петербургской епархии; иеромонах Иларион (Карандеев), исполняющий обязанности наместника Свято-Успенского Псково-Печерского монастыря, с братией обители в священном сане; иеромонах Иоанн (Лудищев), наместник Сретенского Ставропигиального монастыря города Москвы.
Тропарь Собору преподобных Псково‑Печерских, глас 6
Собо́р святы́х Пско́во‑Пече́рских днесь почти́м,/ в де́брех лесны́х оби́тель чу́дную основа́вших,/ и, я́ко кри́ны, доброде́тельми процве́тших,/ и лю́дем пра́вый путь богоподо́бия указа́вших,/ мо́лят бо Го́спода// ми́ру мир дарова́ти и ве́лию ми́лость.
Ин тропарь Собору преподобных Псково‑Печерских, глас 4
Днесь оби́тель Пско́во‑Пече́рская све́тло пра́зднует, преподо́бных свои́х собо́р почита́ющи; просия́ша бо зде Богоно́снии отцы́, челове́цы же небе́снии, земни́и а́нгелы; се в Дому́ Твое́м, о Богома́ти, ра́дование и всех ве́рних весе́лие духо́вное, я́ко дарова́ла еси́, о Благода́тная, пречестны́я нам пред Го́сподем засту́пники и моли́твенники о душа́х на́ших.
Кондак Собору преподобных Псково‑Печерских, глас 2
Тебе́, Богоро́дице/ и Де́ве Чи́стей, за вся лю́ди Бо́га умоля́ющей,/ оби́тель Пско́во‑Пече́рская/ святы́х свои́х, я́ко дар, днесь прино́сит,/ Твои́х же даро́в бога́тство кто испове́сть,// я́ко в рай возвела́ еси́ отцы́ на́ша.
Величание Собору преподобных Псково‑Печерских
Ублажа́ем вас,/ преподо́бнии отцы́ на́ши Пско́во‑Пече́рстии,/ и чтим святу́ю па́мять ва́шу,/ наста́вницы мона́хов// и собесе́дницы А́нгелов.
Молитва Собору преподобных Псково‑Печерских
О, преподо́бнии и Богоно́снии отцы́ на́ши: Ма́рко, Ио́но, Корни́лие, Вассиа́не, Дорофе́е, Ла́заре, Симео́не, Алекса́ндре и ма́ти преблаже́нная Ва́ссо!
Смире́нно припа́даем к вам, я́ко пра́ведником су́щим, и́же в Пско́встей земли́ просия́вше пресла́вно, укра́сили есте́ оби́тель Пече́рскую жития́ ва́шего чу́днаго звезда́ми пресве́тлыми; к вам прибега́ем и, с любо́вию хва́ляще днесь, предста́тельства про́сим за нас, многогре́шных: умоли́те Го́спода Сил и Пречи́стую Его́ Ма́терь, да сохраня́т Росси́йскую страну́ на́шу ми́рну, утвердя́т в благоче́стии зе́млю Пско́вскую и да покро́вом благода́ти Своея́ град сей покро́ют, оби́тель же на́шу укрепя́т и всем подвиза́ющимся в ней да́руют спасе́ние и Жизнь Ве́чную.
Помози́те нам, уго́дницы Бо́жии, созда́ти храм благоле́пен в сердца́х на́ших и украси́ти сей храм доброде́тельми, да жи́тельствует в нем еди́но Госпо́дь! Огради́те нас стено́ю моли́тв всепобе́дных от грехо́вных стрел врага́ спасе́ния на́шего и от всех его́ злых искуше́ний, да Богоуго́дне зде на земли́ поживе́м и ве́чное Ца́рство Пресвяты́я Тро́ицы унасле́дим, прославля́юще при́сно Отца́ и Сы́на и Свята́го Ду́ха, ны́не и в безконе́чныя ве́ки. Ами́нь.
Смотрите также
Актуальное
